Bushra Abu Hamdia
مشرفة الألعاب الألكترونية
احبتي جميعاً اسعد الله ايامكم بطاعته
احياناً يكون الإنسان بحاجة الى الشكوى والبوح لاحبته
وهذه القصيدة(إن صح التعبير) اوجهها الى نسيبي
اخي وحبيبي ابو تركي الذي اشهد الله واشهدكم أنني احبه في الله
احببته مع انني لم اتشرف بلقائه ولكن تجمعني به احياناً بعض الإتصالات
التي قد بخل البعض بها علينا!!!!!!
فاليه واليكم هذه التخاريف
الله من قلب العنا يانسيبي
عيا يطاوعني وانا ازريت لا ارضيه
يتلني تل الرشا بالقليبي
وانا العطيب اللي زمانه لعب فيه
كنك تمله فوق صالي اللهيبي
قلبٍ على الخالق لك الله مشاكيه
توي شباب وقرب الوقت شيبي
وقتٍ سرابي واتعبني مساريه
من حر ما اونس ياغناتي غديبي
وكثرت عليه ياالنسيب المشاريه
وفي كل مجلس يانسيبي حكيبي
ولا احدٍ درى قلب العنا ويش خافيه
رحت الطبيب وقال جرحك عطيبي
واللي سواة جراحكم ما نداويه
ماهو هوى همي لك الله غريبي
شئٍ يشيب الراس من حس طاريه
ثارت عليه بندقٍ من قريبي
من راميٍ صاد الهدف قبل يرميه
لولا الحيا لاشق ياخوك جيبي
واجاوب الورقى بصوتٍ تغنيه
يردني عن بعض الانذال طيبي
واللي خطاة اللاش ماني مراعيه
وعليك ابشكي حالتي ياعتيبي
ياالنادر اللي عالياتٍ مجانيه
عقب الحرار مطوعين الصعيبي
اللي اعتلوا من سلم المجد عاليه
ربعٍ الى لاقى حريبٍ حريبي
يبشرون الذيب باللي يعشيه
ياحظ من هو من عتابه قريبي
انشهد انه ذاك ماتربت يديه